بغداد

بغداد انسي احزانج
ترى الكاس باحضانج
****
بغداد جري انفاسج
شوفي الكاس يم راسج
*****
بغداد مسحي دموعج
والكاس بين ضلوعج


****
تنومس يا وطنه عندك أولاد
جابوهه البشارة لحضن بغداد


****
العب يالعراقي ونوّر الساحه
خل يفرح وطنه الباكَوا افراحه
صار الكاس النه بهمة الحلوين
هذولنه احنه شعب ينهض على جراحه
امسح دمعتك مامش دمع هاليوم
سمانه عاليه وبيهه كَــمر ونجوم
غني للعراق وخل غناك يدوم
حناجرنه تظل بحروفه صدّاحه
والعب يالعراقي ونور الساحه


******


تألق ابن بابل وابن آشور
وجاب النه الفرح وكَلوبنه نذور
اصفر يا حكم واعلن لنا الفوز
صوانينه شمع معلوكَه وبخور
يالموحد شعبنه كلنه وياك
قوية ضربتك وتهز الشـْباك
نفض همه شعبنه بفرح ملكَاك
فريق الخير دومك تظل منصور
وتألق ابن سومر وابن اشور
*****


عامر يا فرحنه وضحكت الديرة
مشكور وابد ما قصّرت (فيرا )
دموعك كَالت الدنيا بعدهه بخير
واخو خيته العراقي ولعب بالغيرة


اجه روج الفرح خل يغسل الأحزان
انزع اسودك والبس هدوم ألوان
راويهم وردنه التارس البستان
وعلى كل غصن غنت للوطن طيره


افرح يا شعبنه بينت الحوبة
سحرهم رد عليهم والحرز طوبه
طلع كل العراق شماله وجنوبه
يباركلك نصر لاحن تباشيره




بعيد الفوز كَالوا عن ابن بغداد
وميدرون العراقي عناد فوكـَ عناد
قرر كاس بيده للوطن لو عاد
لاعبنه البطل خلاهم بحيرة


واخو خيته العراقي ولعب بالغيرة


******


زخ علينه يا فرح زخات حلوه
عطش بينه سنين ، غرِّكَنه ، نريد يطكَـ وردنه
احنه ما تكفينه مزنه
حلم يا دنيا تفرحينه بولدنه
بيكم يشــْيـــل العراق الراس عالي
يا شباب الوطن لا ما راح عزنه
من لعبتم احنه فزنه
حلو لاعبنه العراقي
الصار بالملعب لوحدتنه رمزنه
بالمحبة والاخوة وماي نهرين العراق
وحنطة السمرة بسمار وجوهكم نشبع ويزيــنه خبزنه
نحب بعضنه ، وما نفك الباب لليزرع الفتنه
ابد ما تنكَطع سبحتنه
واذا كَطعوه كَوه
غصباً عليهم نظل نلضم خرزنه
والعراق الله يا هذا العراق تظل جبير
شايلينك طلّسمنه
انكتب بحروفك حرزنه
انكتب بحروفك حرزنه